LEXUS -GX-in DÜNYA PREMYERASI

GX üçün xüsusilə yaradılmış radiator qəfəsi çarpaz struktura malikdir və ban rənginə boyanan aşağı qoruyucu panel ilə birləşir.  Radiator qəfəsinin güclü görünüşü banın seçilən və möhkəm “miləoşxar” formasını vurğulayan xətlər yaradır.  Həm qəfəs, həm də faralar yolsuzluq şəraitində hərəkət zamanı maneələrlə toqquşmaya yol verməmək üçün mümkün qədər hündürdə yerləşir. Həmçinin radiatorun soyuducu kanalları da daha yaxşı iş göstəricilərini təmin etmək üçün hündürdə yerləşir.  

Avtomobilin arxa hissəsində Lexus-un lampaları hündürdə yerləşən L-şəkilli işıq paneli yer aldığına görə, GX-i yolsuzluq şəraitlərində hərəkət zamanı digər avtomobillərdən asanlıqla seçmək olur.

Mühərrik əvvəlki 6 mərhələli transmissiyanı əvəz etmiş 10 mərhələli avtomatik DIRECT SHIFT transmissiyası ilə işləyir. Transmissiya güclü və ardıcıl sürətlənmə hissini ötürmək və sürücünün sürətlənmə pedalından istifadəsinə dərhal cavab vermək  üçün tənzimlənib. Müştərilər də V6 mühərrikinin daha sakit işini qiymətləndirəcəklər.

Ön və arxa asqı həm yolda, həm də yolsuzluq şəraitində hərəkət zamanı sabitliyi təmin etmək üçün optimallaşdırılmışdır.  Arxa tərəfdə asqının dəqiq tənzimlənməsi çuxurlar və oyuqlar üzərindən keçərkən zərbə hissini azaldır, ban konstruksiyasında isə birləşmələrin gücləndirilməsinin yeni metodlarından istifadə sürmə zamanı ən yaxşı hissləri təmin etməyə kömək edir.

“Overtrail” - GX-in həqiqi yolsuzluq avtomobili xüsusiyyətlərinə yönəlik yeni üstün komplektasiyasıdır.  Üslubu, təchiz edilmiş avadanlığı və texnoloji xüsusiyyətləri  avtomobilin çətinkeçilən yolların öhdəsindən gələ bilmə potensialını gücləndirir və həyatında macəralara yer ayıran müştərilər üçün uyğundur.

Müstəsna 18 düymlük təkərləri, 20mm genişləndirilmiş protektoru, təkər qövslərinin qara moldinqləri, yan qoruyucusu və alümünium alt qoruyucuları sayəsində avtomobilin xarici görünüşü diqqətləri üzərinə cəlb edir.  Bu xüsusiyyətlər, sadəcə, xarici görünüşlə məhdudlaşmır və Lexus-un şin təchizatçıları ilə birlikdə bütün növ yolların tələblərinə cavab vermək üçün hazırlanmış şinləri ilə birlikdə  sürücüyə mürəkkəb marşrutlarda hərəkət zamanı əminlik hissi verir.

“Overtrail” komplektasiyasının bamper kənarları bir qədər yüksəldilib və sürücüyə maneələrin yanından keçmək üçün asanlıqla manevr etməyə imkan verir.  Lexus tərəfindən ilk dəfə təqdim edilmiş bu Elektron kinetik dinamik asqı sistemi (E-KDSS) son dərəcə nahamar səthdə hərəkət zamanı daha böyük təkər artikulyasiyası sayəsində əlavə dəstəyi təmin edir.  Bu sistem, həmçinin adi yollarda hərəkət zamanı banın əyilmə dərəcəsini azaldaraq daha sabit gedişi təmin edir.   

Avtomobilin ön hissəsində aksesuarların bərkidilməsi üçün nəzərdə tutulmuş ayrıca mərkəzi konstruksiya yerləşir.  GX üçün əlavə xüsusiyyətlərin geniş seçimi təklif edilir. Bu imkan avtomobilin sahibinə öz avtomobilini fərdiləşdirmək və onu açıq səma altında əyləncəli macəralar üçün uyğun şəkildə təchiz etməyə imkan verir.

GX modeli “Tazuna” konsepsiyası ilə yaradılmış salonla təmin edilmiş ən son modeldir. Burada bütün idarəetmə elementləri və məlumat mənbələri sürücünün minimal əl və ya göz hərəkətini tələb edən yerdə yerləşdirilmişdir.  Bu dizaynın yaradılmasında dizaynerlər atlının atı cilovun köməyi ilə idarə edə bilməsini əsas götürmüşdür. Yapon dilində buna “Tazuna” deyilir.

Üfüqi cihaz paneli və alçaq yerləşən pəncərə xətti daha yaxşı görmə sahəsini təmin edir ki, sürücü avtomobilin yoldakı vəziyyətini daha yaxşı hiss edə bilsin.  İrəli çıxan 14 düymlük sensorlu ekran multimediya funksiyalarından aydın və asan istifadəni təmin edir.

Avtomobildə bel və çanaq ətrafında daha yaxşı dəstəyi təmin edən konstruksiyaya malik sürücü oturacağına xüsusi diqqət ayrılmışdır.  Oturacaq yastığının da quruluşu səfərin yorucu olmaması üçün onurğa sütununu və başı daha yaxşı dəstəkləyəcək şəkildə nəzərdə tutulmuşdur.